A antesala luminosa

Un chisco afastada dos canons da novela negra, o inspector Sánchez móvese nesta obra a partir da aparición de dous cadáveres calcinados que aparecen nas inmediacións da praia coruñesa do Matadoiro na madrugada de San Xoán do ano 2000. Hai crime, intriga, corrupción, impunidade, whisky abundante, sexo, prostíbulos, garitos de xogo... pero tamén outra historia sobre o amor, a convivencia, o demo, o inferno –a loucura– como tema catalizador, como antesala luminosa da morte. E un diálogo entre un texto de capítulos pares escrito en terceira persoa polo fuxitivo e outro que funciona a modo de impares nos que o inspector narra en primeira persoa. Podería falarse de dúas novelas e dun xogo metaliterario: a primeira das historias transcorre en doce días e a outra alóngase durante vinte anos.